മുകുളം വിജയഗാഥ

നാലാം ക്ലാസിലെ മലയാളം പാഠപുസ്തകത്തിലുള്ള കുഞ്ഞുണ്ണി കഥയുടെ അനുബന്ധ പ്രവർത്തനങ്ങളുടെ ഭാഗമായാണ് കവി കുഞ്ഞുണ്ണി മാഷെ് അടുത്തറിയാനും അദ്ദേഹവുമായി സംവദിക്കാനുമുള്ള “കുഞ്ഞുണ്ണി മാഷെ അറിയാൻ” പഠനയാത്ര സംഘടിപ്പിച്ചത്. ചെറുങ്ങോരൻ കഥ പഠിപ്പിക്കുന്നതിനിടയിൽ കുട്ടികൾ പ്രകടിപ്പിച്ച ഒരാഗ്രഹമാണ് ഒടുവിൽ ഒരു പഠനയാത്രയായി കുഞ്ഞുണ്ണി മാഷിൻ്റെ വീട്ടിലേക്കെത്തുന്നതിലേക്ക് നയിച്ചത്. അതിന്റെ മുന്നോടിയായി നാലാം ക്ലാസിലെ കുട്ടികൾ എഴുതിയ മികച്ച രചനകളും മറ്റു ക്ലാസുകളിലെ രചനകളിൽ നിന്നും തെരഞ്ഞെടുത്ത കഥകളും കവിതകളും കുഞ്ഞുണ്ണി മാഷിന് അയച്ചുകൊടുത്തു. 

ഒപ്പം കുഞ്ഞുണ്ണി മാഷെ കാണാനും മാഷുമായി അഭിമുഖം നടത്താനുമുള്ള ആഗ്രഹം പ്രകടിപ്പിച്ചുകൊണ്ടുള്ള കുട്ടികളുടെ കത്തും ചേർത്തു. ദിവസങ്ങൾ നീണ്ട കാത്തിരിപ്പിനൊടുവിൽ അതു സംഭവിച്ചു, കുഞ്ഞുണ്ണി മാഷിൻ്റെ കത്ത് മണ്ണഴി സ്കൂളിലെ കുട്ടികളെ തേടി എത്തി അതിൽ ഇങ്ങനെ എഴുതിയിരുന്നു.

“മണ്ണഴി സ്കൂളിലെ എൻ്റെ കൊച്ചു കൂട്ടുകാരേ, ഞാൻ നിങ്ങളെ കാത്തിരിക്കുന്നു പ്രിയപ്പെട്ട അധ്യാപകരേ, മോഹനൻ മാഷേ, സന്തോഷം. താഴെ പറയുന്ന രചനകൾ വളരെ മികച്ചതായി എനിക്കു തോന്നുന്നു. ഈ കുഞ്ഞുങ്ങളെയും കൊണ്ട് എന്നെ വന്നു കാണുക.”

കുഞ്ഞുണ്ണിമാഷെ കാണാൻ ഭാഗ്യം ലഭിച്ച ആ വിദ്യാർത്ഥികൾ ആരൊക്കെ ആണെന്നറിയണ്ടേ…! ശ്രുതി പ്രകാശ്, രാഹുൽ ശങ്കർ, സൗമ്യ എം.പി, അനൂപ്.കെ, ചാന്ദ്നി ,നിവേദ് മോഹൻ, അഞ്ജു. എസ് രാജ് എന്നിങ്ങനെ  രണ്ട്,  മൂന്ന്, നാല് ക്ലാസുകളിലെ ചങ്ങാതിമാർ !

ഹെഡ് മാസ്റ്റർ ശ്രീ. ടി. പി കുര്യാക്കോസ് മാസ്റ്ററുടെ നേതൃത്വത്തിൽ യാത്രാസംഘം ഒരുങ്ങി. പിടിഎ പ്രതിനിധിയും പൂർവ്വ വിദ്യാർത്ഥിയുമായ രാജേഷ് മണ്ണഴി, ബി.ആർ.സി പ്രതിനിധിയായി എ. കെ കൃഷ്ണകുമാർ എന്നിവരും കൂടെ ഉണ്ടായിരുന്നു. 

“കുഞ്ഞുണ്ണി മാഷെ അറിയാൻ” പഠനയാത്രയിൽ എന്തെല്ലാം ഉൾപ്പെടുത്തണം എന്നായിരുന്നു പിന്നീടുള്ള ചർച്ചകൾ ചെറുങ്ങോരൻ പതിപ്പ്, കുട്ടികളുടെ കവിതാ സമാഹര പ്രകാശനം, പഠന സംഘത്തിലെ ഏഴ്  വിദ്യാർഥികളുടെ ബാലസാഹിത്യകൃതികൾ, അഭിമുഖം, കവിതാലാപനം, നാടൻ പാട്ടുകൾ, പഴഞ്ചൊൽ കേളി.. തുടങ്ങിയവയും കുട്ടികൾ ഇൻലന്റ് രൂപത്തിൽ എഴുതി ഉണ്ടാക്കിയ “”മുകുളം” ഇൻലൻ്റ് ലെറ്റർ മാസികയും. അക്കൂട്ടത്തിൽ കുഞ്ഞുണ്ണി മാഷിന് ഏറ്റവും ഇഷ്ടപ്പെട്ടത് കുട്ടികൾ സ്വന്തമായി എഴുതിയും വരച്ചും തയ്യാറാക്കിയ “മുകുളം കുഞ്ഞുണ്ണിയ്ക്കൊരു കുഞ്ഞു മാസിക” എന്ന സമ്മാനപ്പൊതിയായിരുന്നു. തുടർന്ന് അതിയാരത്തെ കുഞ്ഞുണ്ണി മാഷ്ടെ പൂമുഖത്തു വെച്ച് മുകുളം കുഞ്ഞു മാസിക മാഷ് പ്രകാശനം ചെയ്യുകയും അത് എല്ലാ മാസവും അയച്ചുതരണമെന്നും നിർദ്ദേശിച്ചു. കുട്ടികളുടെ സമ്മാനത്തിന് പകരമായി ഒരു സമ്മാനം കുട്ടികൾക്ക് നൽകാനും കുട്ടികളുടെ കളിത്തോഴനായ കുഞ്ഞുണ്ണി മാഷ് മറന്നില്ല. 

മുകുളത്തിന്റെ ഒാരോ ലക്കത്തിലും പ്രസിദ്ധീകരിക്കാനായി തന്റെ നാലുവരി കവിതകൾ അയച്ചു തരാമെന്നും തന്റെ പേര് മാർഗ നിർദ്ദേശകൻ എന്ന രീതിയിൽ മുകളത്തിൽ ഉൾപ്പെടുത്താൻ സമ്മതിക്കുകയും ചെയ്തു. മാഷുടെ ആ വാഗ്ദാനം അദ്ദേഹത്തിന്റെ മരണംവരെ തുടർന്നു. പ്രകാശനത്തിനു ശേഷം മുകുളം അച്ചടിച്ചു പ്രസിദ്ധീകരിക്കാൻ തുടങ്ങി. മുകുളത്തിന്റെ ആദ്യത്തെ എഡിറ്റർ നാലാം ക്ലാസുകാരിയായ ശ്രുതി പ്രകാശ് ആയിരുന്നു. രാഹുൽ ശങ്കർ, അനൂപ്, നിവേദ് മോഹൻ, ചാന്ദ്നി, സൗമ്യ എം.പി, അഞ്ജു എസ് രാജ് എന്നിവരായിരുന്നു ആദ്യത്തെ എഡിറ്റോറിയൽ ബോർഡ് അംഗങ്ങൾ.